Sidene må fiksast for mobil, av og til er det noko eg må skjekke og skal bruke mobilen og skjemst for det merakkelset eg får opp på den vesle skjermen. yikesyikesyikes. Men det er slikt som tar tid og ikkje er særleg kjekt. Men det hadde vore greit om sida var perfekt for alle mine skjermar i alle fall og ikkje berre dataen. 🎵 Eg har nettopp sotte nokre timar og skrevet på plasmolyseteksten og eg blei litt hekta på musikken til fyr som kallar seg Mad Tsai - songane er korte så eg antar det er TikTokmusikk, men det er så koseleg og minner meg om musikk frå då eg var ung (yngre).

Eg strikka eit par sokker til mamma, berre for å ha mista ei maske heeeeilt nede ved hælen. haha, eg måtte stoppe sokken samstundes som eg festa trådar 👻. Er det lov å gi stoppa sokkar i julegåve? Kanskje må eg strikke eit par til? Det eg har mest lyst til for tida er å sjå RoyalOperaHouse sin Così fan tutte, den likte eg så godt. Han gav meg ein slik god følelese av håplaus og tragisk kjærleik og lagnad, akkurat slik eg likter det. Men eg klarar ikkje finne han gratis på nettet, og om eg kjøper ein månad med deira straumeteneste så må eg jo nesten bruke det òg - og har eg tid til det? Tja. Det er jo ein del sokkar å strikke visst? Eg må lese litt meir bøker ferdig fyrst trur eg så det er gjort og blir valgt bort.

Uffuffuff, no er det slik stress igjen, kvar november: åja jul ja. julegåver. Eg er slik som helst ikkje vil kjøpe gåver eg vil lage dei, eg veit i alle fall då eg var liten var ikkje mine venninner særleg fan av det, men det er slik eg uttrykker min kjærleik så då får dei berre godta det. Så no er det strikke sokker strikke sokker strikke sokker, kanskje hekle noko (men eg har så krise teknikk at eg får berre vondt i handledda av å hekle), aller helst skulle eg malt eit fint bilete - men kva?! Også må eg lese: eg leser middlemarch og ei kjærleiksbok på spansk, men midt oppi dette bestemte eg meg for å dra til Tallinn, så då vil eg lese estiske bøker for å forberede meg, så eg leser alle dei estiske bøkene eg finner. Også gartnervgs da, denne månaden er det ei oppgåve om plasmolyse eg må få gjort (ei veke igjen?!) men det var så kjedeleg og eg fekk det ikkje til. Eg er så klønete.

Nytt mål: førre månad så sov eg omlag 6 timar kvar natt og det er for lite, eg vil ha meir søvn. Diverre har eg et svært dårleg utgangspunkt for denne månaden og må nå sove mykje for å ta igjen for den fyrse veka.

Men det har endeleg blitt tid for nye vaksiner til katten igjen, verste dag i året - ho er alltid illsint hjå dyrlegen og gjer meg så flau! Dei tør ikkje ta i ho 😩 Også skal dei klippe hårklumpane av ho, eg prøver å vere flink å gre pelsen hennar, men ho hatar alla kammar og kostar og springer alltid og gjemmer seg under bordet. Det er ein del pinnholding involvert med denne katten haha. Ho er berre vanskeleg altså, eg trur ikkje ho er redd - sinnet ho viser hjå dyrlegen blir ikkje overgått.

Eg leverte inn herbariumet, håper det blir godkjent - eg er litt ferdig med det nå. Dessverre er eg ikkje heilt fornøyd med teikningane, appen krasja før eg var ferdig og eg måtte laste han ned på nytt og både tapte dei tidlegare filene (eg har dei lagra som bilder med ikkje som teiknefil) og penn-instillingane mine, så strekane ser så svake og utydelege ut på dei siste bildene og det irriterer meg. Særleg den siste: stjernemagnoliaen, iiiik eg skjemst. Men korleis skal eg eigentleg teikene in busk som blømer på bare kvister med kvite blomar på kvit bakgrunn. Irriterande. Og fonten eg bruker tar seg ikkje heilt ut på pdf av ein eller anna grunn - han er ÒG uklar?! Kvifor er alt så uklart og irriterande?

Så er det den andre oppgåva då, den med nærmiljøet. Heldigvis berre noko me skal gjere og ikkje bli vurdert på. Kunne eg ikkje vald eit nærmiljø som var 1. litt tydelegare i sin type 2. lettare å komme seg til.?

Eg heiv på plass ved i heile går og eg har så klart ein ufatteleg dårleg teknikk så nå har eg aua håndleddet 😢 og eg som skulle teikneteikneteikne! Det er same smerte som når eg hekler, det er visst ein dum måte eg bruker håndleddet på.

Eg begynte litt på gartnervgs? Veit ikkje kva gartner er eingong, men eg har i allefall plutseleg fått lekser! 😭 Og eg er like dårleg på å få det gjort som alltid, så eg later som om eg gjer det for Soloppsprang i staden for. Eg har ikkje lagt ut sidene ennå, men dei kjem til å ligge under "Løye".

Og eg snakka med M i forgårs og me delte litt musikktips, mitt tips til ho var Jeremias, og eg fekk Chappel Roan, Cat Burns og Mon Rôvia tilbake, og Cat Burns: einaste eg har hørt på nesten dei to siste dagane! 😍

Eg finner ikkje heilt gleden i å skrive om bøkene eg leser lenger. Eg veit ikkje om det er bøkene som ikkje heilt fenger meg (men eg leste jo den Braiding Sweetgrass som eg elska..?) eller om det berre er eg som er litt i ein bølgedal dette året (og fjoråret). Kanskje eg må ta meg meir tid til bøkene - for tida føles det som om eg les på så mykje, men det er så mykje forskjellige dikt og kva som helst. Men det føles litt som om eg berre les utan heilt å tenkje over kva eg les, sjølv om det er mykje sakprosa.

Eg brukte idag fleire timar på å organisere nettlesarbokmerkene mine. Det var både surt og interessant og mest av alt NAUDSYNT! Eg gjekk frå 300-ettelleranna til 100-ettelleranna bokmerker. 👍👍👍 Eg har ikkje skreve noko om bøkene eg har lest i det siste, men sånn er det berre med det. Eg las ei om fossilar som var kjempespennande, men det var lydbok og eg måtte ofte høyre det same om og om og om igjen for å å det med meg. Det var litt komplisert og nytt for meg, men så interessant (Otherlands) også las eg Piranesi som eg trur eg har på leselista mi så den burde eg jo faktisk skrive noko om når eg tenkjer meg om akkurat nå. Men eg kjente meg så altfor godt igjen i Piranesi det blei liksom litt i overkant 😭🙃 Og no les eg ei bok om ein ingeniør som jobba med Bergensbanen då den blei bygga - han bruker mykje tid på fjelltur. Men han skildrer fjellet og arbeidet svært vakkert. (Da Bergensbanen blev til: fem års ingeniørsliv på høyfjellet).

Også laga eg egentleg tidlegare i sommar ei side lik som denne men med mat-fokus. Men eg har berre to opskriftar eg kom på å skrive. Eg bruker som regel ein del oppskrifter sjølv, men det betyr vel kanskje at eg må bli betre på det grunnleggjande og frigjere meg frå å måtte slå opp kor mykje gulrøter som trengs i ei gulrotsuppe (men det er alltid MYKJE meir enn eg trur). Eg må berre komme på ein oppskrift til, så kan eg legge til sida - det ser litt meir estetisk ut med 3 i alle fall.

Hmmm, eg trur ikkje eg kjem til å gjere ein god jobb i år med å lese dei bøkene eg satte på leselista for 2024, det er jo aldri dei bøkene eg har lyst å lese for tida? Og når eg prøvde - greven av montecristo - så var det ein Flopp 😿! Men eg vil lese meir av skodespela i alle fall.

Prosjektet med å berre ha eitt kaffimåltid til dagen gjekk ad undas 🌊 ganske fort, så nå blir det forsøk to: berre boller og kaker på laurdagar. (Også skal eg prøve å skrive ned kva eg eter, men ikkje til kalorinivå (uansett har eg erfaring nok til å vite kaloriene utan å slå det opp 🫠)).

Men i morgon er det syttandemai! Kva skal eg da finne på i finveret? Eg har lyst til å bade i sjøen, men sjøen er så kald i mai. Men det hadde vore SÅ FINT å få bade (som er min absolutte FAVORITTAKTIVITET (som ingen av vennene mine har til felles med meg 😭😭😭)) på sjølvaste syttandemai. Blir det ikkje stranda, så blir det berre stova eller terrassen liksom, prate med plantene mine 🌱 Kjekke dei da. Eg høyrer for tida på Braiding Sweetgrass og eg blir stadig rørt til tårer, forfattaren snakka i går om ein elsker jorda? jojo så klart. Men trur ein at jorda elskar ein tilbake? Og det trur eg verkeleg, tvilar ikkje eitt sekund! Eg føler det på heila kroppen, på fingrane i molda og tærene i graset og nasen i blommane og bladene i tekoppen og det er faktisk svært fint å vere ute å gjere hagearbeid. Er hagearbeid OK på syttandemai? Eg seier det er det etthundreprosent, vakrare arbeid finst ikkje.

Kvar måne 🌙 når eg får mensen blir eg alltid så usikker og nervøs, som om det kvar gong er fyrste gong eg opplever å blø. ...Kva er dette blodet? Kor kjem det frå? Er det noko gale med meg? Altså eg er ikkje redd mensen, men eg er redd at eg skal blø av andre årsaker og at det at det blør akkurat no - at det fell saman med menstruasjonen er ein tilfeldighet, eit ondt sjebnebedrag. At det som ein ser på som trygt og traust, som ein mens som kjem kvar måne, berre skjuler ein ekkel sanning, sjukdom. Uff, hormonforandringane mensen drar med seg hjelper vel heller ikkje - skjønt det er lite eg misliker meir enn tanken å vere slave av sine eigne hormon. EG! regjerer over mine hormoner, dei har ingenting med å regjere meg.

Har eg nemnt før at eg må rydde opp i nettlesarens bokmerker? Eg må nemne det igjen. Også skulle eg ynskje at bokhylla.no ikkje logga meg ut kvar dag, men holdt meg innlogga, det er så innnnnnnnmari irriterande å stadig måtte logge seg inn. Også må eg nemne ei teikneseriebok eg las her forleden, eg lenker til å på sida med morosamme lenker inne på biblioketet. Det er ein grov versjon av eit A&M eventyr der prinsessa som skal vinnast, faktisk allereie har ein kjærast: trollet. Eg hugsar at eg stussa litt på då eg las det at eventyret var ikkje heilt tilfredsstillande. Eg visste jo allereie at A&M sensuererte og det trur eg nok dei må ha gjort med dette eventyret. Teikneserieboka er vel den forfattarens versjon, men eg syntest det var underhaldande. Eg likte trollfjella! Men eg var ikkje så glad i slutten der prinsessa blir reinsa for ein trolldom? At heile tida før det så hadde ho ikkje vore seg sjølv? men forheksa? Det var litt skuffande i begge versjonar.

Er både vafler og sjokolade kaffimat? 😳 Eg kan ha feila allerede dag 2 på min "eitt kaffikosmåltid til dagen"-diett. Eg begynne på ny i morgon! Men eg må fyrst ete opp dagens sjokoladeplate så eg kan ha noko anna til kaffikos då 😌

Forresten sletta kindlen nesten alle bøkene mine som eg hadde lagt inn. Kan du tenke deg noko så frekt! Det er fort gjort å legge dei tilbake, men tenk om eg ikkje hadde vore heime med datamaskinen min. Eg hadde vore fullstendig boklaus! dååååån!

Katten er på diett, ho må ned i alle fall ein kilo og det går treigt. Men det betyr òg at eg stadig må på vekta sjølv 😭 Så eg tenkte at ka om atte eg berre har eitt kaffikosmåltid til dagen? eg må ha eitt, men det treng jo ikkje vere store greiene. Eg lover å sei ifra vist eg sviker 🗡️❤️

Også har eg så lyst til å legge til ein kirsebærblombakgrunn her. Skal eg gjere det?

Ja, tydelegvis

Dette året har til nå vore litt rart for meg. Eg får liksom ikkje gjort noke, og eg har ikkje lyst til å gjere noke. Det er som om eg kan stirre rett i veggen og la tida fly utan at eg merker noko. Eg burde jo i alle fall lese, men eg legger fort bøkene bort etter berre et par sider. Eg har fått litt merkeleg vondt i hodet(ikkje hodeverk, men som om det sitter ein tjukk og feit ein oppå der 😈). Eg trur det er ein stiv nakke som er årsaken. Men han irriterer meg.

Noko meir postivt er at eg har begynt på hobby#548(nevnte det førre gong ser eg): ballett på soverommet. Det var denne ballettjanuaren eg ikkje klarte å legge bak meg visst. Eg var lei ballett i ei veke og så ville eg ikkje berre sjå fleire sjovs, men eg ville danse sjølv. Det er kjekt og det er så mykje utstrekking og uttøying og det liker eg så godt - og eg hadde heilt gløymt ut kor godt eg likte det!

Noko som må bli betre: er at eg et heilt grusomt mykje is og sjokolade når ingen ser på. Kvifor klarer eg ikkje kontrollere meg når eg er aleine. Er eg ikkje sjef streng nok? Innenfor samme sjanger så må eg vel òg ein dag ta mot til meg å få gjort noko med SSS (det Store Skumle Skjebnesvangre(IYKYK))

PS. det går bra med katten. Betre enn nokonsinne eigentleg.

Katten må trekke dei siste tennene ho har ☹️ Det går vel godt, ho er stridig nok til å tygge tørrfor utan tenner òg (ho eter berre tørrfor og hatar alt anna). Men sikkert nå som då så vil ho nekte å nokon antibiotika og det er jo svært synd. Førre gong berre kryssa eg fingrane og holdt ho inne ei ekstra veke, og eg må vil gjere det denne gongen òg. No er ho i tillegg på slanking og kvardagen har blitt ekstra hard for alle, ho gjer seg ekstra søt når ho ber om meir mat 😿😽😺.

Eg har blitt hekta på dansing, eller "dansing". Det er vel for det meste ein fot fram og ein fot fram og slikt det går i, men plutseleg går timane likevel. 💃

😭😭😭 Dagboka! 🥺🥺🥺 Eg les på Greven av Monte Cristo ikkje sant, og har gjort mitt beste for å ikkje lese ein forkorta utgåve - eg ville helst lese på norsk. Og eg har gjort så mykje research og lagt inn så mykje arbeid med dette her altså, det er seriøst ikkje måte på (i alle fall skjekka både wikipedia og leksikonet og gjort eit googlesøk som gav null resultater) og eg starta altså lese Johanne Buvik sin, den er i 3bind og det føltest betryggande. Men så lasta eg ned den engelske utgaven som låg på gutenberg for å lese på senga på kindlen, og den er definitivt meir detaljert! Går det verkeleg ikkje ann å informere om slikt på forhånd! Finst det eit register for forkorta bøker, eller må eg berre gå ut ifrå at dei norske omsettingane av gamle bøker alltid er forkorta? Det same skjedde jo med den polse boka, sverd og ettelleranna. Kanskje eg må likevel halde meg til engelske omsettingar frå gutenberg - dei er det lettare å finne informasjon om i alle fall.

Kvar gong eg opnar nettlesaren så irriterer eg meg med ein gong over alle desse bokmerka eg visst samlar på men brukar aldri. Eg drøymer om den dagen eg gidder å gå igjenom dei og slette alle sider eg aldri kjem til å vitje igjen og ikkje minst alle lenker til sider som ikkje ein gong finst lenger! Kvifor skal eg drasse rundt på dette. Men eg lurer på bokmerka som går til matoppskrifter. Eg bruker dei regelmessig og eg ser for meg at det hadde vore meir ~romantisk~ om eg hadde skrive dei ned i ei bok, men eg trur eigentleg at eg hadde søkt meg fram til nettsidene i staden likevel 😳. Og alle lenker som går til strikkeoppskrifter og maleteknikkar og videoar om ditt og datt - kanskje eg nesten burde bruke desse sidene som eg ein gong tenkte at eg skulle.

Eg må erstatte fonten Libre Baskerville med noko anna - han er heslig å lese. Eg må gå gjennom filene for å skjekke kven det gjelder. Det er ikkje mykje arbeid men det er kjedeleg arbeid. Eg trur eg brukar ein av dei fontane eg har brukt andre stader som eg veit eg liker. Det skjer ikkje i kveld.

Og eg har slikt press på hodet i det siste, det er ukomfortabelt å skrive på nettbrettet. Eg trur det er nakken som er i overkant stiv og støl og at eg må gå meir tur og bevege meg meir. Men la meg berre sei eg er blitt litt kroppslig inspirert av ballettstrømminga i januar (ikkje at det fører til dei styrste resultata for nakken, men rørsle er rørsle).

Kindlen er alltid i flightmodus, eg treng ikkje internett og vil unngå bruke omsettar når eg les spanke bøker (det er så lett å falla for fristelsen). Om nettet er på dukkar det opp reklamer for bøker på framsida når kindlen er av. Utan nett så er det bilde av ei dame med eit teleskop som kikkar opp mot månen og stjernene.
Det minner meg alltid om den mørke og dramatiske traileren før nokre av disneyfilmane eg hadde på video som liten. SpAcE mOuNtAiN! Eg klarte aldri forstå kva det var trailer for, kva film er dette liksom? Finst han berre som trailer? Eg forstod seinare då at det var snakk om ein berg-og-dalbane. Men i mitt hjarta vil det alltid ver ein trailer for verdas kjedelegaste film.

Her i forgårs dukka det opp ny video på Youtube frå JB, ho som var så glad i Wilkie Collins og Italia, det var pga ho eg las Herodotus (skjønt ho ikkje kom så langt sjølv!). Men ho hadde dessverre dødd rett etter nyttår (ukjente årsakar, minner meg om han bakaren på same alder, Døden er så lunefull!). Det er heilt forferdeleg trist, ho er yngre enn meg og virker ein god del smartare enn meg. Ho var ein slik ein så lett kunne sjå opp til, ein kvardags-flinkis (i motsetning til ein eller annan falsk superstar).

Om det er lov til å hoppe frå eit seriøst tema til eit mindre eit, så ser eg for tida på Opera og ballett på ROH sine nettsider. Eg prøver å sjå ein av kvar kvar dag slik at eg får sett alt eg vil på ein månad. Og eg trivst. Eg skal lese litt Shakespeare (RJ, Midtsommernattsdrøm, Macbeth og WintersTale) til dei som er basert på det og eit drama av Turgenev. Men det dukker nok ikkje opp tekstar her om dei.

Det var lisom meininga at eg skulle lese meg ferdig med bøkene før nyttår: Kreftavdelingen frå NB i tilfelle ho forsvinner og Krydderboka fordi lånet går ut. Men denne her Krydderboka frister meg slik til å spille Civilization, og det er som om eg berre ser i retning det spillet så har det plutseleg gått 10 timar. Eg held som regel ikkje lenger ut enn til nokon går til krig mot meg, då går eg av med pensjon med ein gong. Men det kan altså fort ta si tid.

I natt drømte eg at eg var i ein slags eventyrby. Det må ha vore ein slags blanding av byen på folkemuseet i Trd og byen i Snøfall. Og det var kveld og alle lysene lyste gult. Også opna det seg ei dør og det strømma folk ut, som om dei hadde vore på nokon forestilling. Blandt dei som kom ut var J og andre eg kjente, men det var vel særleg J eg både ville unngå og ville snakke med. Eg lot som ingenting og gikk forbi samtidig som eg prøvde fange J sin oppmerksomhet - som blei fangen då eg hørte namnet mitt ropt ut etter meg. Men det var allereie morgon og eg vakna.

Markjé grønast og sjógen bråna men det skjer kvar desember etter eit fyrste snøfall. Eller isbelegg. No går det endeleg ann å køyra igjen utan at det er krise om det kjem ein bil imot, og piggane blir lagte bort til neste år.

Eg hadde så lyst til at min favorittforfattar skulle vere Sigrid Undset, eg hadde liksom forberedt meg på at det skulle vere eit svar på eit slikt spørsmål. Men no er eg nett ferdig med Våren og eg trur eg berre gir opp på alle resten samtids-romanane hennar. Det er berre perfekte hovudpersondamer og alle andre damer er rett og slett stygge og gjerne feite, ofte late og ganske lause. Tema: mor og barn. Sted: Oslo. Meg: 🤮

Når det nærmer seg eit nytt år blir eg så ivrig med forsettene. Sjølv om eg aldri held dei. Men eg har så lyst til å bruke Operaboka meir, sjå operaer (på Youtube) og lese samtidig i boka. Få nytte av boka, bli kjent med opera. Eg har prøvd sånn halveis før, men eg blei heilt knekt av Tristan og Isolde - det var dødsens kjedeleg. Driitlangt, berre kjedelege kulissar og kjedelege sangar. Ingen dans ikkje noko kor. Yikes.

Også er det all denne strikkinga. Einaste måten eg får lest noko no, er når eg kan lese samtidig som eg strikker nesten! Det er lue på lue på lue (Eg blir jo aldri fornøyd så eg berre rekker det opp igjen 🫠), også blir det sokker til mamma, sokker til E&E. Også vil eg jo kanskje ha ein kort laus genser til meg sjølv som eg kan ha til skjørt. Om eg ikkje er dritalei strikking før eg kjem så langt.